Міхаіл Быкоўскі з Меркулавіч лепшы на прэсаванні сена
Усё сваё жыццё Міхаіл Быкоўскі шчыруе на палетках роднай меркулавіцкай зямлі. Перад службай ва Узброеных Сілах краіны працаваў вадзіцелем, а пасля арміі перасеў за руль трактара. Так больш за 35 гадоў па сенажацях і бульбяных палетках.
Калісьці ў саўгасе «Меркулавічы» налічвалася 3 трактарныя брыгады, у адной Міхаіл быў брыгадзірам. Шмат зямлі перавярнулі плугі яго «Беларуса» пад зерневыя, а яшчэ больш – пад бульбу. Мужчына з году ў год садзіў, акучваў, апрацоўваў тукамі і затым збіраў на камбайне нямецкай вытворчасці добрыя ўраджаі другога хлеба.
Сёння аб’ёмы вырошчвання бульбы ў гаспадарцы значна меншыя, таму Міхаіл Быкоўскі заняты на прэсаванні сена. У гэтым годзе для пагалоўя грамадскага статка неабходна нарыхтаваць на зіму 900 тон гэтага корму. Вопытны механізатар на МТЗ-80 накатаў па полі 482 тоны сухой травы. І гэта самы высокі паказчык у раёне.
Аграрый заўсёды ў лідарах гарачых сезонных сельскагаспадарчых працэсаў, а зімой рамантуе тэхніку і займаецца адвозкай гною. Прозвішча перадавога работніка раней было занесена на раённую Дошку гонару. Штогод трактарыста ўшаноўваюць граматамі, падзячнымі лістамі і падарункамі ад райвыканкама і прафсаюза АПК. Не абыйшлі ўвагай і сёлета – Анжаліка Краўчанка паціснула руку механізатару і ўручыла дыплом пераможцы.
В.БАГДАНОВІЧ