Дзень пісьменства ў Слоніме і кожным куточку Беларусі
Дзень беларускага пісьменства – адна з самых яскравых падзей, што адзначаецца на высокім дзяржаўным узроўні.
Кожны год Беларусь выбірае горад, які прымае пісьменнікаў і дзеячаў культуры. Упершыню святочныя мерапрыемствы адбыліся ў 1994 годзе ў Полацку. Таксама форум прымалі Тураў, Навагрудак, Нясвіж, Орша, Пінск, Заслаўе, Мстіслаўль, Мір, Камянец, Паставы, Шклоў, Барысаў, Смаргонь, Хойнікі, Ганцавічы, Глыбокае, Быхаў, Шчучын, Рагачоў, Іванава. Сёлета Дзень беларускага пісьменства будзе адзначацца ў Слоніме.
Свята пачнецца з адкрыцця помніка былому слонімскаму старасце Льву Сапегу. Гэты дзень аб’яднае таленавітых творчых людзей, пакажа, як мы, беларусы, шануем сваю спадчыну і што чакаем ад заўтрашняга дня. Літаратурныя дыспуты, узнагароды пераможцам конкурсаў, канцэртныя праграмы, разнастайныя выставы – свята нікога не пакіне абыякавым.
У кожным куточку Беларусі таксама будзе адзначацца вялікая культурная падзея. На Чачэршчыне пройде цэлы Тыдзень беларускага пісьменства. Ён пачнецца з Дня адчыненых дзвярэй, выставы-экскурса і гісторыка-пазнавальнага марафона. Аматараў друкаванага слова чакаюць у цэнтральнай бібліятэцы 3 верасня. Назаўтра дзятва і дарослыя адправяцца ў слайд-вандроўку. 5 верасня чытачы пазнаёмяцца з творчасцю народнага пісьменніка Беларусі Міхася Лынькова, якому сёлета спаўняецца 120 год з дня нараджэння. 6 верасня адчыняцца дзеры кніжнай хаткі.
Усе мерапрыемствы пройдуць у адзіны час – 14.30. Сельскія бібліятэкі таксама запрашаюць прыняць удзел у Тыдні беларускага пісьменства. Наведвальнікаў чакаюць кніжныя і фотавыставы, конкурсы і пазнавальныя гульні, літаратурна-музычныя вечарыны.
Ірына ЧУЯНКОВА
Фото из сети интернет.
