Дзве паловы жыцця на Чачэршчыне: школа і гармонік
Любоў Галубіцкую ведае, напэўна, кожны жыхар раёна. Ганаровы грамадзянін Чачэршчыны ўзначальвала Меркулавіцкую сярэднюю школу з 1986-га па 2011 год, была кіраўніком народнага ансамбля народнай музыкі і песні «Чачэрскі гармонік», якому ў 1994 годзе было прысвоена званне «Народны аматарскі калектыў».
Яна актыўны ўдзельнік шматлікіх міжнародных фестываляў, абласных аглядаў, конкурсаў. Узнагароджана граматамі аддзелаў адукацыі, культуры, Міністэрства адукацыі і абласнога ўпраўлення, аблсавета дэпутатаў. Таленавітая жанчына зараз сумяшчае дзейнасць настаўніка нямецкай мовы і працу ў музеі хлеба ў аграгарадку Батвінава.
А яшчэ Любоў Аляксандраўна добры і чулы чалавек. Багаты жыццёвы вопыт, адкрытая душа заўсёды прыцягвалі і прыцягваюць да яе людзей. Музыка і настаўніцкая дзейнасць цесна перапляліся ў жыцці Любові Аляксандраўны. І ім яна прысвяціла ўсё сваё жыццё. Настаўнік – гэта адказна: лёс чалавека ў значнай меры залежыць ад яго ведаў, педагагічнага таленту, чалавечых якасцяў. І гэта вельмі добра разумее Любоў Аляксандраўна.
Дзякуючы ёй, шмат выпускнікоў Меркулавіцкай школы працуюць настаўнікамі замежнай мовы. Адкрыла і для мяне, і для іншых дзверы ў цудоўны свет ведаў. За гэта я бязмерна ўдзячна Вам, Любоў Аляксандраўна!
Прывівае любоў да народнай музыкі Любоў Аляксандраўна і на занятках школьнага аб’яднання па інтарэсах «Фалькларынка». З вялікім задавальненнем маленькія хлопчыкі і дзяўчынкі спяваюць песні, прыпеўкі, іграюць на трашчотках.
Чачэршчыну чакае цудоўнае будучае, бо побач з намі жывуць такія таленавітыя людзі, якія з’яўляюцца самым першым багаццем краю.
Юлія ДУБЯНОК
