У Палессі каля Дома культуры прайшло свята вёскі
Мерапрыемства праводзілі ў 15-ты раз – менавіта столькі працуе ў ДК ініцыятар святочнага гуляння Надзея Патапава. А сам аграгарадок бярэ пачатак з 1772 года. За гэты час змянілася шмат пакаленняў, у вайну загінула 178 жыхароў, таксама на вясковых могілках пахаваны воін-інтэрнацыяналіст Сяргей Гарбачоў.
Але добрага было больш: нараджаліся дзеці, у свет выходзілі таленавітыя землякі, сярод якіх пачэсны грамадзянін раёна Міхась Болсун, вучоныя Леанід і Дзмітрый Сасноўскія. На ўрачыстасці прагучалі прозвішчы старажыла – 96-гадовай Марыі Ядранцавай
– і самага маленькага жыхара Арсенія Скварцэўскага. Дзячылі шматдзетным матулям Аксане Драздовай, Галіне Юрчанка, Надзеі Дубянок, Ірыне Лашкінай і Наталлі Пазняковай. У прыклад аднавяскоўцам – падворак Івана Хішчанкі, які прызналі лепшым па выніках конкурсу па добраўпарадкаванні.
Добрыя словы палясчанам выказала старшыня мясцовага сельвыканкама Аксана Драздова, а цудоўны канцэрт прапанавалі артысты народнага вакальнага ансамбля «Чачэрцы». Дарэчы, у складзе гурта ўраджэнец аграгарадка Васіль Мельнікаў.
Пакуль дарослыя назіралі за выступленнем калектыва, дзеці бавіліся на батуце, таксама для іх арганізавалі продаж салодкіх ласункаў.
Валянціна ПРАНКЕВІЧ