Чачэрск апладыраваў маэстра

У дваннаццаты раз па чачэрскай зямлі пранеслася віхурай класічных і джазавых мелодый, прагучала мажорам эстрадных савецкіх і айчынных песень свята беларускай музыкі «Чачэрскія сустрэчы».

Заслужаны калектыў краіны Нацыянальнага акадэмічнага канцэртнага аркестра пад кіраўніцтвам прафесара Міхаіла Фінберга ў каторы раз дзівіў і ўразіў жыхароў краю віртуознасцю ігры, рознапланавасцю жанравай палітры і высокім выканаўчым майстэрствам. Галасамі роднай зямлі спявалі вядомыя артысты Беларусі, а лірычныя пагудкі флейты, кларнета, арфы, скрыпкі і іншых духавых і струнных інструментаў паланілі гледача магіяй чароўных гукаў.