Нісімкавіцкія школьнікі на абласным конкурсе атрымалі Дыплом I ступені
Традыцыйныя беларускія гульні па-ранейшаму цікавяць хлопцаў і дзяўчат. У Нісімкавіцкай школе захаванню сваёй спадчыны надаюць вялікую ўвагу, таму вывучаюць мясцовы фальклор і ўдала дэманструюць яго на сцэне.
Рухомыя, каларытныя героі выклікаюць замілаванне, абуджаюць самасвядомасць. На абласным конкурсе «Шануйце спадчыну сваю» яны прадставілі гульні «У Трыфана», «Пячэнне хлеба», «Авечка» і іншыя. Такім чынам фальклорны калектыў школьнікаў ва ўзросце 10-13 гадоў пад кіраўніцтвам педагога Надзеі Цімашэнка атрымаў Дыплом I ступені галоўнага ўпраўлення адукацыі Гомельскага аблвыканкама. Аматары традыцыйнай культуры і раней прымалі ўдзел у такіх мерапрыемствах, заваёўвалі ўзнагароды, але пераможцамі сталі ўпершыню. Яны дзякаючы за дапамогу ў падрыхтоўцы да конкурсу Бабіцкаму цэнтру народнай творчасці, музыкі і песні, раённаму цэнтру творчасці дзяцей і моладзі, аддзелу адукацыі райвыканкама.
Лідзія ХАРАШЫЛАВА.
Фота з Інтэрнэту.
