Новы імідж “Чачэрскай лютні”
Выкладчыкі школы мастацтваў і ансамбль этнічнай музыкі «Чачэрская лютня» ў першы дзень восеньскіх вакацый на канцэрт запрасілі школьнікаў раёна, а таксама ўсіх жадаючых.
Адкрылі мерапрыемства Роберт Рыбянчанка і Аляксей Кулеш з інструментальнымі кампазіцыямі. Пад акампанемент Вячаслава Андрэенкі спявала на англійскай мове Марыя Маслава. Увазе слухачоў прапанавалі імправізыцыю фартэпьяна-баян.
Калі на сцэну выйшлі ўдзельнікі «Чачэрскай лютні», зала літаральна засвяцілася ад камер гаджэтаў. Падлеткаў вельмі зацікавіла творчасць гурта ў жанрах поп-фолк і фолк-рок. Да таго ж музыкант Аляксей Кулеш распавядаў пра вытокі песень, паходжанне розных інструментаў, запрашаў на заняткі ў школу мастацтваў. Рыфмаваныя радкі пра жыццё і каханне, працу і родны край прыдумалі нашы прабабулі і прадзядулі. Зараз у сучаснай аранжыроўцы народныя матывы хвалююць сэрцы нашчадкаў.
Аляксей Кулеш паабяцаў падарунак-сюрпрыз таму, хто размесціць відэа з канцэрта ў інтэрнэце і набярэ шмат станоўчых водгукаў. Адзін з ролікаў ужо даступны на YouTube.