Чарговая сустрэча майстроў высокіх надояў

Чарговая сустрэча майстроў высокіх надояў адбылася за круглым сталом, дзе члены аб’яднання маглі абмеркаваць праблемныя пытанні, расказаць пра тое, як дабіваюцца пэўных поспехаў па надоях малака і якіх працоўных вяршынь плануюць дасягнуць у будучым. Старшыня раённага камітэта прафсаюза работнікаў аграпрамысловага комплексу Вольга Ігнаценка адзначыла, што за пяць гадоў існавання клуба змянялася колькасць яго членаў, але мэта заставалася ранейшай – быць заўсёды ў лідарах і паказваць іншым прыклад стараннасці.
З паказчыкамі па надоях малака ў раёне прысутных пазнаёміла галоўны заатэхнік упраўлення сельскай гаспадаркі і харчавання райвыканкама Наталля Пархамец. Дасягненні радуюць, як адзначыла спецыяліст. Калі ў 2007 годзе на Чачэршчыне звыш пяці тысяч кілаграмаў малака на карову атрымалі 12 аператараў машыннага даення, то па выніках 2011 года іх было 14. А прагноз гэтага года і таго аптымістычней – Валянціна Саханава з ААТ “МатнявічыАгра” па выніках дзевяці месяцаў надаіла ад адной каровы 5 341 кілаграм сырадою. У сярэднім жа па раёну гэта лічба складае 3 475 кг. Перадавы рытм задаюць работнікі ААТ “Отар” і матнявіцкія жывёлаводы. На пытанне да майстроў высокіх надояў, як жа атрымоўваецца ісці наперадзе і не зніжаць тэмпу, яны адказалі, што галоўнае – дысцыпліна, адказнасць плюс правільная тэхналогія кармлення і ўтрымання пагалоўя. Вось і ўвесь сакрэт поспеху! Хвалявала жанчын і ўкараненне новых метадаў работы, у прыватнасці перавод жывёлы ў даільныя залы. Паступова гэты працэс ужо праводзіцца на малочна-таварных фермах Чачэршчыны, але хутка стане нормай дзейнасці ўсіх МТФ. Час ідзе, і трэба за ім паспяшацца, каб заставацца на вяршыні працоўных перамог і славы.
Напрыканцы сустрэчы ўсім удзельнікам мерапрыемства прапанавалася паглядзець выступленне графскага тэатра і духоўна адпачыць падчас камедыі А.Сумарокава “Раганосец па ўяўленню”.