Бібліятэка на колах спяшаецца да чытачоў
Пасля доўгага перапынку з-за каранавіруса бібліёбус цэнтральнай раённай бібліятэкі аднавіў выезды на вёску, дзе знаёмую машыну ўжо зачакаліся кнігаманы. На гэты раз маршрут пралягаў праз Покаць, Пехцерава, Чырвоны Бераг. Пачуўшы гукавы сігнал, людзі выходзілі з хат, агародаў і неслі на замену мастацкую літаратуру, перыядычныя выданні. Асобныя бралі па 6-10 экзэмпляраў, каб назапасіцца да наступнага разу. У Ганны Ціцянковай з Чырвонага Берага трое дзяцей. Маленькая Сонечка сама выбірае тое, што ёй даспадобы. Гэта кнігі з яркімі малюнкаміілюстрацыямі. А вось яе бацькі аддаюць перавагу раманам і дэтэктывам.
Наогул жа ў населеным пункце жывуць адны з самых актыўных чытачоў раёна – 36 чалавек. Сярод іх Пётр і Марыя Дзегцяровы, а таксама вартаўнік леспрамгаса Міхаіл Новікаў. «Міхаіл Васільевіч ўсю нашу бібліятэку перачытаў. Нават не ведаю, што яму прапанаваць», – усміхаецца загадчык аддзела абслугоўвання і інфармацыі цэнтральнай райбібліятэкі Таццяна Крыжанкова.
У Пехцераве на парозе хаты Аляксандра Геўрасёва першым сустрэў перасоўную бібліятэку шчанюк Барсік. Ён стрымгалоў кінуўся да людзей і пачаў лашчыцца каля ног. Пакуль яго гаспадар пераглядваў ваенную літаратуру, Барсіка гладзілі па галоўцы і песцілі. Дарэчы, Аляксандр – інвалід 3 групы, жыве з дзядзькам Віктарам Пятровічам, які летам прыязджае на малую радзіму з Гомеля. Днём мужчына займаецца гаспадаркай, даглядае пчол. А вечарам за квартай гарбаты са свежым мядком няблага і кніжку пагартаць, ці прагледзець раённую газету. Між іншым, «Чачэрскі веснік» тут паважаюць і пра ўсе цікавыя падзеі Чачэршчыны з ахвотай даведваюцца са старонак раённага сродка масавай інфармацыі.
За бягучы перыяд года бібліёбус выязджаў на вёску 5 разоў, кнігавыдача склала звыш 500 экзэмпляраў, агульная колькасць чытачоў – 237 чалавек. Гэта тыя, каму тэлевізар і інтэрнэт не заменяць друкаванае слова, магчымасці задаволіцца ў вольны час добрым раманам ці захапляльным прыгодніцкім сюжэтам. Прычым абслугоўванне вяскоўцаў – бясплатнае.
Валянціна ПРАНКЕВІЧ.
